Igitego cya Michael Obafemi kibujije Man United kwinjira mu makipe ane ya mbere muri Premier League

By Mugisha Aimé-Thierry Jul 13, 2020 11:58pm 268 Views

Igitego cya Michael Obafemi kibujije Man United kwinjira mu makipe ane ya mbere muri Premier League


Igitego cyo ku munota wa nyuma cya Michael Obafemi gitumye Manchester United itarara ku mwanya wa gatatu ku rutonde rw'agateganyo rwa shampiyona y'ikiciro cya mbere mu Bwongereza nyuma yo kunganya na Southampton ibitego 2-2 kuri Old Traffold.

Manchester United yasabwaga gutsinda uyu mukino igahita yinjira mu makipe ane ya mbere muri Premier League igafata unwanya wa gatatu nyuma yuko Chelsea na Leicester City zitakaje imikino yazo mu mpera z'icyumweru gishize.

Chelsea yatsinzwe ibitego 3-0 na Shiffield United kuwa Gatandatu mu gihe na Leicester City yatakaje umukino wayo igatsindwa na Bournemouth ibitego 4-1 kuri uwo munsi.

Manchester United yatangiye umukino itari kwitwara neza kugeza igihe Southampton yafunguye amazamu ku munota wa 12 w'umukino nyuma y'amakosa yakozwe na Paul Pogba wananiwe kugumana umupira yari ahawe nuko Nathan Redmond akawumwaka, ahita awuhereza Stuart Armstrong ahita afungura amazamu.

Nyuma y'umupira mwiza Marcus Rashford yahawe na Anthony Martial yaje kwishyura igitego ku  buryo bwakozwe na Paul Pogba wahinduye umupira ugafatwa neza na Martial wahindukiye neza awuhereza Rashford ahita aterekamo igitego cyo kwishyura ku ruhande rwa Manchester United.

Nyuma y'iminota itatu yonyine Manchester United yishyuye, Anthony Martial yaje guterekamo igitego cya kabiri cya Manchester United nyuma yo kunyura muri ba myugariro ba Southampton akarekura ishoti rikomeye rikerekeza mu izamu — igice cya mbere cyarangiye Manchester United iyoboye ku bitego 2-1.

Southampton yaranzwe no gukina neza cyane mu gice cya kabiri byumwihariko nyuma yuko Paul Pogba ba Bruno Fernandes basohotse mu kibuga basimbujwe yakomeje gushaka igitego cyo kwishyura ariko Manchester United ikomeza kwihagararaho.

Mu minota ya nyuma y'umukino, Brandon Williams wari winjiye mu kibuga asimbuye Luke Shaw (wagize ikibazo cy'imvune) yaje gusohorwa mu kibuga nyuma yuko agonganye n'umukinnyi wa Southampton akagira ikibazo ku mutwe nuko Manchester United ikina iminota y'inyongera ifite abakinnyi 10 mu kibuga.

Ku munota wa 97 w'umukino nyuma ya koruneri yahinduwe na James Ward-Prowse igakorwaho na Jan Bednarek umupira ukananirwa gukurwaho na Victor Linderof byatumye Manchester United yisanga yishyuwe igitego ku munota wa nyuma cyatsinzwe na Michael Obafemi nuko amakipe yombi agabana amanota kuri Old Traffold anganyije ibitego 2-2.

Manchester United igumye ku mwanya wa gatanu ku rutonde rwa shampiyona, isigara irushwa na Chelsea iri ku mwanya wa gatatu amanota abiri mu gihe irushwa inota rimwe na Leicester City iri ku mwanya wa kane — harabura imikino itatu ya shampiyona. 


Gira icyo ubivugaho


INKURU BIJYANYE


By Kwizera Yamini
Oct 26, 2017 3731 Views

By Kwizera Yamini
Oct 26, 2017 8655 Views

By Kwizera Yamini
Oct 26, 2017 4423 Views