Borussia Dortmund yongeye gushyiraho igiciro ntarengwa kuri Jadon Sancho wifuzwa na Manchester United

By Imikino Magazine Jul 13, 2020 09:54am 273 Views

Borussia Dortmund yongeye gushyiraho igiciro ntarengwa kuri Jadon Sancho wifuzwa na Manchester United


Muri iyi minsi, isoko ry'igura n'igurisha ry'abakinnyi ku mugabane w'iburayi rirashyushye, aho amakipe atandukanye akomeje kwifuza kwiyubaka agura abakinnyi bashya, Jadon Sancho ni umwe mu bakinnyi bakomeje kuvugwa ko umwaka utaha ashobora kuzakinira ikipe ya Manchester United ikomeje kugaragaza ko imwifuza cyane.

Uyu mukinnyi mu mwaka w'imikino wa 2019-2020, yitwaye neza cyane afasha ikipe ye ya  Borussia Dortmund gusoza ku mwanya wa kabiri muri shampiyona y'icyiciro cya mbere mu gihugu cy'Ubudage ( Germany Bundesliga ), aho yayitsindiye ibitego 17 akanatanga imipira 16 yavuyemo ibitego mu mikino 32 yagaragayemo.

Borussia Dortmund,yamaze kongera kubwira ikipe ya Manchester United ko niba yifuza Jadon Sancho, igomba kumugura miliyoni 130 z'amayero zingana na miliyoni 117 z'amapawundi, nkuko ikinyamakuru gikurikiranira hafi amakuru y'iyi kipe kitwa Manchester Evening News kibitangaza.

Jadon Malik Sancho, yavutse tariki 25 Werurwe 2000, avukira i London mu gace kitwa Cramberwell, ni umukinnyi ukina asatira izamu anyuze ku ruhande rw'iburyo, ubusanzwe yazamukiye mu ikipe y'abato ya Watford kuva 2007-2015, kuva 2015-2017 yakinaga mu ikipe y'abato ya Manchester City, hanyuma aza kuyivamo yerekeza muri Borussia Dortmund ubwo yagurwaga miliyoni 8 z'amayero, akaba afite amasezerano muri iyi kipe azamugeza kuwa 30 kamena 2022.

Manchester United, mu bandi bakinnyi ikomeje kwifuza harimo Kalidou Koulibaly myugariro w'ikipe ya Napoli, Jack Grealish ukinira ikipe ya Aston Villa, ndetse na Ben Chilwell myugariro w'ikipe ya Leicester City ukina ku ruhande rw'ibumoso.

yanditswe na Serge Leandre


Gira icyo ubivugaho


INKURU BIJYANYE


By Kwizera Yamini
Nov 1, 2017 1236 Views

By Kwizera Yamini
Nov 4, 2017 1476 Views

By Kwizera Yamini
Feb 17, 2018 1252 Views