Athletics: Umugande Joshua Cheptegei yandikiye amateka akomeye mu Bufaransa

By Imikino Magazine Aug 15, 2020 04:05pm 323 Views

Athletics: Umugande Joshua Cheptegei yandikiye amateka akomeye mu Bufaransa


Joshua Kiprui Cheptegei yandikiye amateka akomeye mu Bufaransa, aho yakuyeho agahigo  k'Umunya-Ethiopia Kenenisa Bekele kari kamaze imyaka 16 mu mukino wo gusiganwa ku maguru ahareshya na Metero ibihumbi bitanu (5000M).

Uyu mugande w'imyaka 23 y'amavuko yatunguye abakurikirana umukino wo gusiganwa ku maguru ubwo yegukanaga irushanwa rya Monaco Diamond League mu gice cy'abasiganwa (5000M), aho yakoresheje iminota 12, amasegonda 35 n'ibyijana 36 (12' 35" 36).

Cheptegei yakurikiwe n' Ubanya-Kenya babiri; Kimeli Nicholas Kipkorir wasizwe amasegonda 16 ndetse na Klop Jacob wasizwe amasegonda 36.

Uyu muvuduko udasanzwe na Cheptegei wakuyeho agahigo ka Kenenisa Bakiele wari waragenze Metero 5000 akoresheje iminota 12 amasegonda 37 n'ibyijana 35' mu mwaka wa 2004. Imyaka yari ibaye 16 ntawundi ubibasha.

Uyu mugabo ukomeje kunezeza abatuye Uganda, akomeje kongera imidari ku yindi, uhereye ku mudari wa Feza yatwariye muri shampiyona y'isi muri 2017, kandi anasanganywe uduhigo two kuba yarakoresheje ibihe bito mu gusiganwa Metero 10000 na Kilometero 15.

Cheptegei yavukiye ahitwa Kapchorwa ho mu Burasirazuba bwa Uganda mu mwaka w'1996. Mu bwana bwe yagerageje gukina umupira w'amaguru ariko ntibyamuhira, bigera aho ahabwa akazi mu giporisi cya Uganda atarabasha gushikama muri siporo.

Kuri ubu akinira ikipe y'ababigize umwuga ya NN running team yo mu Buholandi, akaba umwe mu bakinnyi bakunzwe cyane mu gihugu cya Uganda.

 

Yanditswe na NGABO Mihigo Frank


Gira icyo ubivugaho


INKURU BIJYANYE


By Imikino Magazine
Aug 15, 2020 323 Views